La Usc di Ladins

Incö, jöbia ai 11 de novëmber, s'á i sozi dl'Assoziaziun Turistica Alta Badia abiné por l'assemblea anuala, reuniun che á ince en chësc ann indô messü gní fata online por via dla pandemia. L'assemblea é gnüda partida sö te döes perts, öna ordinara, tratan chëra che al é gnü danterater aprové le bilanz consuntif, la cuota soziala y le bilanz de previjiun por le 2022. Tratan chësta pert êl ince preodü n intervënt da pert dl presidënt de Dolomiti Superski Andy Varallo, che ess informé sön la sajun da d'invern che metará tosc man. Varallo n'á indere nia podü intevegní, deache al ê impegné te na sentada olache al gnará fat fora regoles y diretives por fá pié ia la sajun dai schi. L'intervënt dl presidënt dai lifc gnará mené fora plü inant tres n videomessaje, á impormetü le presidënt dl'ATAB, Oscar Alfreider.

Tla pert straordinara dla assemblea él spo gnü aprové la trasformaziun dl'Assoziaziun Turistica Alta Badia te na sozieté cooperativa, en presënza dla notara Federica Isotti. Por la situaziun particolara che i viun, él sté la poscibilité da aprové la trasformaziun tres deleghes. Da pert di 780 sozi che fej pert dl'ATAB, él gnü mené ite 624 deleghes y al é insciö gnü arjunt le quorum por podëi porté inant la trasformaziun te na sozieté cooperativa.

Deplü sön ci che é gnü dit tratan l'assemblea anuala de ATAB podëise lí tla ediziun stampada de chëst'edema che vëgn, che gnará fora le vëndres ai 19 de novëmber.  (kp)