La Usc di Ladins

La lëtra mët man cun "Cari sozi dla Cooperativa Turistica Al Plan y San Martin...". Ci che vëgn do é n apel che plü tler ne podessel nia ester, por porvé da ti splighé ai operadus turistics che la sajun manacia da tomé t’ega n secundo iade.

"Ai 11 de novëmber unse albü na reuniun danter Helmuth Sartori, presidënt di implanc portamunt dl Südtirol, Thomas Widmann y Daniel Alfreider, sciöche ince i rapresentanc dla sanité. La situaziun ti ospedai é dramatica. I sun tla plëna pandemia Covid di nia vaziná, ince porsones plü jones s’amarëia dassënn y debota por la varianta Delta. Sce ti proscims 7–8 dis ne ván nia sö cun la variora de almanco 10% dla popolaziun, restará i implanc portamunt stlüc por le secundo iade, y en chësc iade ma tl Südtirol. Lapró n’él preodü no contribuc provinziai, no statai.
Mi apel urgënt da se fá la variora, por chi che ne l’á nia bele fata, é adressé a döta la popolaziun di dui comuns de Mareo y San Martin, por le bëgn de nosta sanité, chëra de nüsc cari y dl’economia da d’invern, da chëra che la maioranza depënn, sides diretamënter che indiretamënter. I implanc portamunt, maestri de schi, imprëstaschi, boteghiers, ostis, afitaciamenes, restoradus y tanc d’atri risćia süa esistënza.
Prëibel manifestun solidarité y responsabilité zivila ti confrunc dla comunité che laora y vir te chësta tera. I ne crëii nia che les sozietés di implanc poratmunt y les atres ativités profescionales pois tigní fora ciamó na sajun tomada fora. Do so falimënt sarál dër ri da costruí sö danü la filiera di schi. I ves prëii, jide a ves lascé fá la variora."  (pablo)