La Usc di Ladins

Por le pröm iade á la junta nöia, litada dl 2020, incunté la popolaziun dl comun de Badia. L'ann passé n'â i assessurs nia podü se abiné cun la jënt a gauja dla pandemia. Ince en chësc ann êl val' dübe, mo tlafinada á la incuntada impó podü garaté, baldi dan da n salf scialdi öt. L'incuntada á metü man cun le salüt da pert dl ombolt, che á recordé les dificoltés che düc nos messun afronté te n tëmp tan malsigü, alzan fora l'importanza da tigní ite les regoles, da se lascé vaziné, por podëi desfiré la sajun da d'invern. Le Covid y la sajun da d'invern tomada fora á gaujé n gran dann economich ince por i comuns, porchël sará les poscibilités da investí ti proscims agn limitades y an messará se conzentré sön chëres che é les priorités.

Chësc é ince gnü sotrissé dal vizeombolt Christian Pedevilla, assessur al sport, che á metü sön mësa le tema dla nodadoia, che ne gnará nia plü fata al intern dl zënter scolastich nü. »Garantí la poscibilité ai mituns y ales mitans da imparé da nodé é n dovëi sozial«, á dit Pedevilla, che á manifesté la orenté da pert dl comun de Badia, adöm cun i comuns da Corvara y La Val, da lauré fora n proiet suracomunal por la realisaziun de na nodadoia publica.

Inant á baié l'assessuria al turism Elide Mussner, che á laldé la bela colaboraziun cun ATAB y ABB tres chëra che al é nasciü le »Green Team Alta Badia«, che laurará concretamënter por le svilup de n turism plü sostenibl. L'asessuria á spo recordé che le comun de Badia mët da jí chisc dis na inrescida sön la mobilité, che an ciafará sön la plata internet dl comun da en vëndres ai 26 de novëmber inant, cun l'invit ala popolaziun da la scrí fora.

Werner Pescosta, assessur ala scora, á cunté dl proiet por la realisaziun dla scolina nöia da La Ila, che messará aspeté deache al momënt n'él nia i finanziamënc por podëi le porté inant. Plü saurí podará garaté le ressanamënt dla scora elementara da La Ila, olache al gnará ince fat n lift por porsones cun dejabilité.

Thomas Pescollderungg á spo porté dant i laurs publics che é gnüs realisá ultimamënter, recordan le gran impëgn di lauranc de comun.

Tlafinada á le publich podü porté dant domandes y/o propostes. En particolar él gnü damané sön la zirconvalaziun da La Ila, che ne garatará bunamënter nia tan atira. Al é indere dër important che almanco öna dles set variantes laurades fora vëgnes portada ite tl plan de svilup comunal, por che chësta proposta pois gní tuta en conscideraziun tl dagní. Da pert dla jënt te salf él ciamó gnü damané sön la poscibilité da porté ite n city bus y la ghiranza da fá plü controi sön les ciases y i apartamënc convenzioná.

Deplü sön la incuntada dla Junta de Badia cun la comunité podëise lí t'La Usc stampada, che gnará fora le vëndres ai 3 de dezëmber.  (kp)