L'Aziënda Sanitara dl Südtirol á metü a desposiziun de düc i scolars y les scolares cin' tesć nasai da podëi fá tratan les vacanzes da Nadé
Da aurí dl ann passé vëgnel pité la poscibilité ai scolars y ales scolares dl Südtirol da fá dui iadi al'edema tesć nasai autosoministrá. Chisc tesć é volontars y la gran pert anüza de chësta oportunité, che pormët da abiné fora y isolé atira coes de infeziuns y da garantí les leziuns en presënza. »I tesć nasai volontars tles scores é stá na iniziativa importanta che á limité les infeziuns tles scores, porchël unse orü la porté inant ince tratan les vacanzes, ti pitan la poscibilité ales families da fá inant i tesć a ciasa«, á splighé l'assessur provinzial ala sanité Thomas Widmann. I tesć án metü man da partí fora ai 29 de dezëmber tles apoteches. Presentan la cherta sanitara di scolars y dles scolares,
án podü pié do cin' tesć, da fá un vigni trëi dis. Chësta scomenciadia pormët da podëi porté inant chësta mosöra de prevenziun ince canche les scores é stlütes. Ara se trata de tesć autosoministrá, che i scolars y les scolares pó se fá instësc, y che ne vel nia sciöche Green Pass. Te na mail menada fora ai geniturs él gnü splighé plü avisa co fá le test y co se comporté sce chësc ess da resulté positif. Iló messarál gní fat n test antigenich – da pert de n dotur o te na apoteca – y sce chësc ess da confermé la positivité gnará la familia contatada dal Ofize Igiena. »A gauja dl gran numer de infeziuns podess l'Ofize Igiena ne sciafié nia da contaté atira la familia. – spliga le diretur general dl'Aziënda Sanitara Florian Zerzer – Porchël inviunse düc canc da tigní n comportamënt responsabl. Sce le test ess da resulté positif, desson resté a ciasa, por ne infeté nia d'atres porsones. Propi por via che gran pert dles infeziuns reverda al momënt i mituns, él dër da mëte averda.« stlüj jö Zerzer.
(Comunicat dl'Aziënda Sanitara/kp)
