La Usc di Ladins

Jon dl vers de na mobilité che dess gní tres plü sostenibla, sënton le debojëgn da cherié coliamënc danter i paisc nia ma plü cun strades, olache an vá cun l'auto, mo ince tres tretuars, por jí a pe y magari ince cun la roda. Chësc ne se damana nia ma la jënt dl post, mo ince i ghesć. Danter La Ila y Badia él bele da plü agn incá n tretuar, mo chësta sort de coliamënt é ma en pert danter i paisc de La Ila y San Ciascian. A gauja dla roa d'Altin á le tru do l'ega messü gní saré jö plü iadi. Chiló él gnü fat laurs y la spazirada é gnüda metüda en segurëza, mo impó se ghira la jënt da podëi jí ince do strada, sön n marciapisc. Le proiet por le realisé é bele da zacontan' d'agn sön mësa y en vëndres él gnü aprové. Al gnará realisé n marciapisc cun döes staziuns dla coriera. Le proiet é gnü fat dal injinier da San Martin de Tor Michael Mischí y le cost por la realisaziun dla strotöra é de 947.983,33 euro. De chisc él 771.818,72 euro por laurs da scrí fora, 11.500,00 euro sciöche cosć de segurëza y 164,664,61 euro sciöche soma a desposiziun dl'aministraziun. Por le proiet gnarál ince damané do finaziamënc preodüs dal plan nazional de recostruziun (PNRR) por infrastrotöres soziales y de comunité. Le proiet é gnü aprové al'unanimité dal Consëi.

Deplü sön i atri punc tratá dal Consëi podëise lí tla ediziun stampada che vëgn fora indoman, vëndres ai 6 de ma.   (kp)