La Usc di Ladins

Sce an ti ciara al codejel che la Cooperativa Turistica Al Plan/San Martin á dé fora en gaujiun dla sentada generala, spo él na lista lungia de cosses che an á fat y öna almanco tan lungia de cosses che an ó ciamó fá. Tröpes é les novités che gareta bele chësc isté: na via ferata sön Piz da Peres y n tru por les families sön Piz de Plaies é ma döes strotöres che an s’arjigna da mëte en pratica. De strotöres nen vára ince por la CT instëssa, che á da püch fat le poch y s’á trasferí ti ofizi nüs, cumprá tl frabicat dla Sozieté di Lifc olache al ê n iade la nodadoia curida. Inant laoron tla CT por arlungé y ince alisiré la sajun da d’isté. Cun le pachet "Autumn Special" ón ti fá la gola al ghest da gní ince da d’altonn, che pîta corusc y morvëies, mo ince plü chît y trancuilité. Un di gragn traverc che an á, é indere ince chël da colaboré deplü cun i vijins ladins de Alta Badia y Gherdëna. "I messun deventé amisc, nia s’odëi sciöche aversars", é la conviniziun dl diretur Carlo Runggaldier.

T’La Usc di Ladins di 13 de má podëise lí deplü sön la via ferata y le tru dles families. Le diretur Carlo Runggaldier nes á cunté deplü sön i ofizi nüs y ciodí che ai porta plü efiziënza tl laur. Al nes á splighé le pachet de vantaji che dess cherdé alerch i ghesć da d’altonn y ince le ciodí che la colaboraziun cun i atri raiuns turistics ladins é da ël infora n debojëgn.  (pablo)