Por n comun bel nët
En sabeda él gnü organisé le de ecologich tl comun de Badia. Ince sot la plöia é n valgügn volontars, gragn y pici, jüs a romené sö i paisc y á ciafé spo na buna griliada tl le bar dl sport a La Ila
Plöia y frëit á caraterisé le de ecologich, che é gnü organisé tl comun de Badia en sabeda ai 7 de ma dal Consëi de Formaziun, en colaboraziun cun la Cooperativa Turistica Alta Badia y les uniuns di stödafüch. Zirca 30 volontars y 13 mituns se á abiné da doman, da mesa les 9, dan i magazins di stödafüch por pié spo ia a romené sö i paisc de Badia, La Ila y San Ciascian. »La gran pert dl refodam che an cöi sö é plastica, de vigni sort de papiers, scarnüc, bozes, mo dantadöt zigarec. I zigarec é indlunch! Danter les atres cosses che an ciafa incërch él ince val' mascherot o val' cossa desmentiada, sciöche ciüries o manëces. Le plü gran scich é sambëgn olache al passa tröpa jënt, a San Ciascian por ejëmpl sön le tru che vá dal Piz Sorega cina tl zënter dl paisc«, nes cunta Elide Mussner, presidënta dl Consëi de Formaziun. Por i volontars che á daidé da romené sö él gnü organisé na griliada tl bar dl sport a a La Ila. Chiló él ince gnü metü da jí na lotaria, dër aprijada dai plü pici. Bunamënter ince a gauja dl burt tëmp ne él nia rové adöm dër tröpa jënt a romené sö i paisc, mo chi che á tut pert á fat n bel laur y nüsc paisc é sëgn indô plü nëc. (kp)
Galaria retrac
View the embedded image gallery online at:
https://www.lausc.it/valedes-ladines/val-badia/19532-por-n-comun-bel-net#sigProIdc48fddbe71
https://www.lausc.it/valedes-ladines/val-badia/19532-por-n-comun-bel-net#sigProIdc48fddbe71