La Usc di Ladins

I se recordun düc la gran presciun ch’an á sintí te nüsc paisc canche al ê da tó sö muciadus dal’Africa. Do che al é spo rot fora ala fin de forá la vera tl’Ucraina, y che an odô les schires de jënt che sciampâ söi confins, án ince chiló da nos metü man da s’arjigné. Dac dl’ajentöra internazionala di muciadus UNHCR dij che 7,3 miliuns de ucrains é sciampá sura confin fora – intratan é passa 2 miliuns indô jüs zoruch.

Scebëgn che an s’aspetâ ince te Südtirol na gran ona de domandes, n’éra cina ciamó nia stada insciö. Tl Südtirol él al momënt danter 1.300 y 1.500 muciadus dal’Ucraina, lion te n comunicat. La maiú pert á ciafé alberch pro conescënc, parënc o cunzitadins che é bele chiló. Impó inviëia la Provinzia privac da mëte a desposiziun cuatiers, cun la impormetüda che te chisc caji vëgnel lascé do l’IMI por döt le 2022. Informaziuns plü menüdes por i muciadus instësc y por chi che ó daidé, ciafon sön la plata www.provincia.bz.it/aiuti-ucraina
Muciadus ucrains él ince te nosta valada, chiló y dailó, mo te n numer scialdi pice. Danter i comuns che á metü a desposiziun cuatiers él chël de Badia. I un tut sö contat cun l’assessuria al sozial Edit Dapoz, por damané tan de posć che al é a desposiziun y co che i muciadus vëgn daidá.

T’La Usc di Ladins di 24 de jügn podëise lí nosta intervista al’assessuria  (Intervista: Pablo Palfrader)