La Usc di Ladins

Le »Bansko Mountain Film Fest« é n festival de films da munt che vëgn oraganisé dai 21 ai 25 de setëmber tla Bulgaria. Le fin di organisadus é chël da mostré, tres films y documentars, la gran varieté de crëps y de munts che é sura döt le monn, deache les munts – sciöche ai scrí sön süa plata internet – ne é nia ma posć olache an vá en vacanza, olache an vá a pe o a d'arpizé. Les munts é ince fontanes de ispiraziun, por süa belëza y maestosité. Insciö saral da odëi fims y documentars che mostra sö munts da indlunch incërch: di Stac Unis d'America y dl Canada, dl'Asia, dl'Europa dl Nord y dl Est, dla Francia, dla Spagna y spo ince di Paisc plü dlungia nos, l'Austria, la Svizera y sambëgn la Talia, che tolará pert al Festival cun bëgn set films. Danter chisc él ince gnü selezioné »In Fanes – andata e ritorno« dl regist y etnomusicologh da La Val, Paolo Vinati, n film che trata dl jí a munt y dl gní de munt tl raiun de Fanes. Le film-documentar de Vinati é bele gnü lascé odëi pro deplü festivals: le Swiss Mountain Film Festival (Pontresina– Svizera), le Sestriere Film Festival, le Alpin Film Festival (tla Romania), le »Voci dei Boschi Film Festival« (Provinzia de Alessandria), le Filmfestival da Balsan y le Videoconcurs Francesco Pasinetti.  (kp)