La Usc di Ladins

Ara é gnüda dessignada da Francesco Fregni la malia nöia da alenamënt dles scuadres joniles de palé dl'Uniun Sport Alta Badia, na malia particolara che á sön la man ciampa le blasun dla uniun y che porta i corusc dla bandira ladina: blanch, vërt y bröm. La malia gnará vistida dales scuadres U10, U12 y dai Jonins, U14. Vigni sogadú á podü lascé scrí sö iadô so inom y chirí fora le numer. Cun les malies nöies á ince scomencé n campionat nü. Sis é les scuadres dl'U.S. Alta Badia che soga le campionat: l'U9, U10, U12 soga le campionat VSS. La scuadra di Jonins (U14) y di Aliefs (U16) soga le campionat de lega FIGC, sciöche ince la pröma scuadra, l'ACD Val Badia. Implü él ince la scuadra di mëndri, l'U8, che ne tolará nia ciamó pert a n campionat (al n'é nia preodü por la categoria U8, ndr), mo che sogará fora por döt l'altonn, y spo indô d'aisciöda, partides cuntra les scuadres dl raiun dla Val de Puster.  (kp)