La Usc di Ladins

Le fat é bele sozedü en sabeda ia por le de. Te na ciasa danter San Martin y Antermëia ál dé ca na esplojiun, olache n berba de püch sura 80 agn é resté bindebó ferí. Le berba á indere pormó cherdé aiüt chësta domënia da doman, olache al é gnü alarmé defata do les 7 i Stödafüch da San Martin y dedô ince i socursc. Alan Trebo, vizecomandant di Stödafüch da San Martin, nes cunta che la esplojiun é stada gaujada tres n fornel a gas – ince sce al sará ciamó i Carabiniers che ará da inrescí les gaujes plü avisa. Le bot mëss indere ester sté bindebó sterch. "Na porta ê spacada fora y ince na finestra", cunta Trebo. La conzentraziun é indere stada sön le ferí, por chël che al é rové alerch la Crusc Blancia, le dotur de emergënza y ince le joler dl Aiüt Alpin, che á spo joré le ferí tl ospedal da Balsan. A d’ël i fajunse les mius aodanzes, por che ara pois jí fora bun.