La Usc di Ladins

En vëndres ai 15 de merz él gnü porté dant sön paladina dla Ciasa J. B. Runcher le spetacul dl "Zircus Musicus". Al se trata de n proiet nasciü dala colaboraziun danter la Müjiga de Badia y la scora elementara. N sëgn de comunité, olache jogn y manco jogn a contribuí a n’ora de aurela cörta por n salf implí de jënt.
Sciöche vigni ann, pón de merz se scrí ite por jí a imparé n stromënt tla scora de musiga. Les uniuns dles musighes dla Val Badia tol tratan chësc mëis l’ocajiun por presenté ince süa uniun y i stromënc che toca lapró. Porchël se á le comité dla Müjiga de Badia, tratan na sentada, ponsé da realisé la presentaziun n iade n pü’ atramënter. Ciaran al dagní dl’uniun y a tan importanc che i jogn y les jones che vëgn docá é, âi damané na colaboraziun cun la scora elementara dl paisc, por mëte tl zënter i mituns y les mitans.
La proposta é gnüda tuta sö cun gran entusiasm, ince sce al ê tröp da ponsé y an ne savô nia avisa ci se aspeté; la sinergia dl lauré adöm á porté sü früc.

I ves pitun chiló valgünes impresciuns fotografiches. Deplü sön le proiet ciafëise t’La Usc di Ladins di 22 de merz  (Lucia Piccolruaz)