La Usc di Ladins

Garejeda de saut y cumbinazion nordica
L Schi Club Gherdëina mët a jì na garejeda naziunela de saut y cumbinazion nordica, n dumënia ai 30 de agost dala 9:30 sun Pana
Families, funzioneres, suste­nidëures y apasciunei ie nviei de cuer a unì a cialé la gareje­des. Dala 12:00 inant dajeràl nce zeche de bon da maië y da bever. La premiazion sarà ntëur la 13:30 pra i sauc.
Nes fajëss’ plajëi pudëi saludé nce Vo!

Festa dl pan
A Badia vëgnel tigní por le secundo iade dai 4 ai 6 de setëmber deplü incuntades liades al pan
Dai 4 ai 6 de setëmber vëgnel tigní la festa dl pan tl paisc de Badia. Al é na festa dedicada al pan y ales tradiziuns de nosta valada. Zacan êl la usanza che la familia da paur se fajô instëssa le pan che ara adorâ y sön i lüsc da paur gnôl fat pan dui iadi al ann: n iade da d’aisciöda y n iade da d’altonn. I dis gnô chiris fora avisa y valutá aladô dl tëmp y dles stëres. La festa dl pan mët man le vëndres ai 4 domisdé cun na escurjiun adöm a Helga, esperta de erbes, y an jará a vijité le vedl morin y furn da pan pro le lüch da Alfarëi. Matteo ti cuntará ai partezipanc dl furn sciöche ince dles vedles atrezatöres da lauré i ciamps. Por tó pert al’escurjiun mësson se scrí ite ti ofizi turistics dl’Alta Badia. La sabeda ai 5 dales 17:00 él na sëra de cunties, tradiziuns y n pice aperitif tla ütia L’Tamá a Badia. La festa dl pan se stlüj jö la domënia ai 6 cun spezialités liades al pan tles üties L’Tamá, Lé, Nagler, La Crusc, Ranch da André y pro le lüch Alfarëi. Le de vëgn acompagné da intrati­gnimënt musical y ativités por pici y gragn.

Final musical cun le »Rodas Quartett«
L’ultim conzert de chësc isté por le Festival Badiamusica é en domënia ai 30 d’agost dales 20:30, tla Ciasa dla Cultura a La Ila. Cianties popolares rumances y di Grijuns
Sön paladina él le »Rodas Quartett« (por rumanc ’rodes’) cun Corin Curschellas, Pa­tricia Draeger, Andrea Kirchhofer y Barbara Gisler. La musizista Corin Curschellas é conscidrada la »gran dama dla chanzun ru­mantscha«, dal momënt che ara s’á dé jö cun les cianties popolares rumances-retiches che vëgn dales tradiziuns orales y dales co­leziuns d’archif. Les cater musizistes de »Ro­das« porta dant les cianties vedles. Les va­riaziuns di toc popolars de »Rodas« é arcaiches, jazzistiches, modernes, atuales y emozionantes, sciöche n caleidoscop musical ví, da corú, emozionant y che roda. 
Le program tol ite cianties popolares ru­mances, cianties tradizionales di Walser di Grijuns, cianties dles valades talianes di Gri­juns, musighes sön poesies rumances te düc i idioms, sciöche ince toc tl dialet de Coira, scrites da Curschellas.

25 agn Museum Ladin
En sabeda ai 5 de setëmber Ves inviunse cun plajëi ales manifestaziuns dl iubileum cun le tema »Vire ti raiuns da munt – danter resiliënza, romagne söl post y vire te n raiun de passaje«
Dales 14:00 ales 16:00 vëgnel pité na vijita acompagnada tla Val di Morins a Lungiarü cun Giovanni Mischì y Herwig Prinoth. Dales 17:00 él la pre­sentaziun di resultac dla inre­scida »Trame di valle. 
Un’ana­lisi reticolare tra tu­­rismo e pra­­ti­che abitative in Val Ba­dia« dl’antropologa Va­lentina Cam­pesi.
Dales 18:00 inant aurela cörta cun DJ set de Silt (duo elena & alma), Louis and the Space Travellers y DJ set de Marco_o. Gnide dötes y düc a zelebré adöm chësc aniversar.

Nadia Rungger prejënta si liber de poejies
N vënderdi ai 4 de setëmber dala 20:00 tl Tublà da Nives
L’autëura Nadia Rungger prejënta si liber de poejies nuef »cësa da lat dijes tu / milchhaus sagst du« (Limbus Lyrik 2026) tl Tublà da Nives te Sëlva, n vënderdi ai 4 de setëmber dala 20:00. Dialogh cun Martina Rier.
»la zità al / mer se pond / sun tiera«, ondes vën au­zedes ora dl mer, na cësa ie ala zibla y datrai chirons l mond cun i uedli stluc. Ma cie su­zédel pa »sce l ne ie nia iló / ulache l ratove«? Te si li­rica ti va Nadia Rungger do a nosc muvimënc, porta la images da una te l’autra rujeneda y ti dà na usc nueva.