La Usc di Ladins

Matiné de leteratöra y musiga
Tla cornisc dl proiet »Ert tla tor« tl ciastel de Tor y Museum Ladin gnarál metü da jí indoman sabeda ai 17 de otober 2026 dales 10:00 na incuntada de poesia ladina y cianties furlanes
Da aldí söl tema »Löm y ambria« saral i scric ori­ginai de deplü auturies y auturs iscric al’EPL-Ert por i Ladins. Dal Friul adalerch vëgn por l’ocajiun le ciantautur Alvise Nodale che portartá dant de sües cianties tl lingaz furlan.
Al sará na ocajiun dedicada ala poesia, tla parora y tl sonn. L’entrada ala matiné é debann.

Na gota demassa
A Badia n curs de ginastica por ëres, por la prevenziun cuntra l’incontinënza y l’arbassamënt uterin
Le Consëi de formaziun Ba­dia mët a jí 3 sëres de in­for­maziun y eserzizi de pre­venziun cuntra l’incon­tinënza y l’arbassamënt uterin. An s’incunta i mer­tesc ai 10, 17 y 24 de no­vëm­ber, dales 20:00 ales 21:00, tl’aula magna dla scora ele­mentara de Badia. Referënta é la fisio­terapista Albina Pescoller. 
Les iscriziuns vëgn tutes sö anter i 31 de otober tres WhatsApp o telefon, pro Margit al 340 3438709. Por le curs él da paié n contribut de 25,00€.

Edema dla Sanité te Mareo
Te cater serades vëgnel traté temesc desvalis, dales tëmes al mobbing, dala segurëza online cina ala sanité che mët man dala semplicité
Dai 19 ai 22 d’otober vëgnel tigní a Al Plan, La Pli y Rina la 23. Edema dla Sanité, or­ganisada dala Crusc Blancia d’Al Plan, en colaboraziun cun i Consëis de formaziun d’Al Plan, La Pli y Rina. Indöt vëgnel pité cater serades, dai temesc plü desvalis.
Les tëmes: ci che ares y ci che nos podun fá
L’Edema dla Sanité mët man le lönesc ai 19 d’otober dales 20:00, tl salf dla Raiffeisen a Al Plan. Le tema dla serada é »Tëmes – Ci che ares fej cun nos y ci che nos podun fá«. Te na mësa torona baiará le psichiater y psico­terapeut dr. Alberto Degiorgis, spo Dorothea Passler che é instëssa stada atocada da tëmes y dëida sëgn d’atri da les despassé, Günther Plaickner – presidënt dla Lia Ariadne, y Thomas Karlegger – surastant dl »Verein Lichtung«. Al moderëia Diego Clara.
La richëza dla semplicité
En mertesc ai 20 d’otober dales 20:00 vára inant tl salf dles manifestaziuns da Rina. Le titul dla serada é »La sanité mët man cun la contentëza y les ligrëzes da vignidé – la gran richëza dla semplicité y dl otimism«. Sofia Ferdigg portará dant sües esperiënzes de volontariat tla Tansania y cuntará de momënc y situaziuns che fej ponsé do y che fej slominé i edli y i cörs.
Segurëza y privacy online
La terza sëra é söl program le mercui ai 21 d’otober dales 20:00, te Ciasa dles uniuns a La Pli. Sot al titul »Segurëza y privacy online – hacking, phishing, social media, IA« él le referënt Alex Ploner che porta dant co che an pó reconësce, evité y se defëne da prighi online.
Les burtes cîres dl mobbing
L’Edema dla Sanité vá a piz la jöbia ai 22 d’otober dales 20:00, tl salf dla Raiffeisen a Al Plan, cun la serada »Mobbing: reconësce – capí – fá val’«. Ara nen vá dles tröpes cîres dl mobbing, che pó ester alüsc tler y sterch, alüsc chît y ascognü. Mo ales porsones atocades ti lascel zoruch fostüs y ferides che döra cotan sura le momënt fora. Al baia la psicologa Corinne Bertoncini y Michael Reiner de Young&Direct. Moderaziun: Diego Clara.

»Nuovo Cinema Dolomiti«
Va inant la proiezions debant al chino de Pardac ogne mèrtesc da les 21:00
Ogne mèrtesc, dai 20 de otober ai 10 de november, l MUSE de Pardac en colaborazion con Trento Film Festival e l Comun de Pardac, sporc cater proiezions che à tout pèrt a la edizion 2026 del Festival cinematografich de la mont de Trent, con entrèda debant. I docufilm vèrda soraldut ai temes del ambient e de la cultures da mont per cognoscer e entener l raport anter om e natura da ponts de veduda desferenc, vejins e dalonc tel temp e ti lesc.
En mèrtesc ai 20 de otober, con La RE.TE, vegn m oscià ‘Mut’ de Giulio Squillacciotti e ‘Bambini di frontiera’ de Manu Gerosa, che conta, travers testimonianzes, la storia del Istitut Alcide De Gasperi e di fies di migranc.  Ai 27 vegn moscià ‘A bear remembers’ de Zhang & Knight e ‘Giro giro tondo’ de Paolo Vinati; ai 3 de november l é ‘Kronoschock’ de Ignasi López Fàbregas e ‘La Cima’ de Si­mone Cargnoni; ai 10 de november se pel ve­der ‘Le Sang et la Boue’ de Jean-Gabriel Leynaud.

Fin dl’edema da susc?

• 
•  

View the embedded image gallery online at:
https://www.lausc.it/manifestazions-y-evenc/32727-manifestazions-atuales-speziales#sigProId6bab6e92f9

Teater a La Ila
L’Uniun Teater La Ila é tl laur da arjigné ca n teater da rí cun le titul »Fin dl’edema da susc« sota la rejia de Erika Castlunger
Sön paladina él da odëi Ales­sandro Bonfanti, Ema­nuel Costa, Amy Crazzolara, Mar­co Moscon, Verena Pes­collderungg, Andy Pizzinini, Roland Pizzinini, Sabine Rudiferia, Tobias Stampfer y Susann Tavella. 
Les rapresentaziuns é: vën­dres ai 23 y sabeda ai 24 de otober dales 20:30, do­mënia ai 25 de otober dales 17:00, mercui ai 28 y vëndres ai 30 de otober dales 20:30, sabeda ai 31 de otober dales 17:00, tla Ciasa dla Cultura a La Ila. Prenotaziuns (ince por WhattsApp) al 352 094 9399.

Di dl barat dla Lia di Culeziunisć
N dumënia ai 18 de utober, dala 9:00 nchin la 13:00, tën la Lia di Culeziunisć de Gherdëina si di dl barat per duc i nteressei tla Cësa di Cungresc a Urtijëi
L sarà na bela ucajion per se ancunté, se giamië ora danter culeziunisć y sambën per baraté d’uni sort de marches, vedla chertes, munëides, chertes dal telefonn y d’auter.

Cunzert dl’Urchestra Haydn
La 60ejima sajon di cunzerc di Jëuni de Mujiga Gherdëina scumëncia cun l cunzert dl’Urchestra Haydn: n lunesc ai 20 utober dala 20:00 tla Cësa di Cungresc a Urtijëi
Per la lingia di cunzerc di Jëuni de Mujiga de Gherdëina ne pòssel nia mancë chël dl’Orchestra Haydn de Trënt y Bulsan, chëst ann sot ala bachëta de Sunwook Kim, che sunerà nce l tlavier.
Sun l prugram saràl chëst ann l cunzert per tlavir y urchestra n. 27 tl si/be-moll maggiore, k 595 de W.A. Mozart, la »Romanze« per urchestra de Niccolò Castiglioni y la 36 ejima sinfonia de W.A. Mozart te do maggiore, k 425 »Linzer«.
La chertes de ntreda ie da giapé pra la cassa y danora tl ufize dla Lia per l Turism de Urtijëi: tel. 0471 777 600–ortisei@valgardena.it. Priejes: 12,00€ per jëuni:es sot ai 26 ani; 20,00€ per granc. Mutons:ans sot ai 14 ani va ite debant.

Laboratore de scritöra cun Nadia Rungger
En sabeda ai 24 d’otober dales 14:00 ales 18:00, tl Museum Ladin Ciastel de Tor a San Martin
Scríeste pa tö? Poesies, aventöres, stories dla bona nöt, cianties d’amur, liëndes: ci orunse pa cunté incö? Scrí y espresciun é n debojëgn, al é liberté y crea­tivité. Vare por vare, parora por parora ti junse pormez al scrí te n’atmosfera de coriosité y ispi­raziun, na lerch por partí pinsiers, por ascuté sö cun atenziun y dí la süa, por s’la rí deboriada te na bela compagnia. En sabeda, 24 d’otober dales 14:00 ales 18:00. Prëibel da se prenoté por tel. 0474 524020 o por mail a prenotaziuns@museumladin.it Iscriziun: 5 €.