Alessandro Chiocchetti campion talian U20

Data

02 de merz 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L joen da Moena é ruà al prum post te la sprint de paslonch e l se à vadagnà l’azess ai Mondièi Juniores ensema a Giovanni Ticcò e Anna Comarella.

L’é stat n bel suzess per i atlec ladins en sabeda ai 23 fe firé, te la pruma giornèda de la garejèdes de paslonch de Copa Tèlia a Falciade, che dapò à cognù vegnir descancelèdes per la dezijions de prevenzion sanitèra.

Te chela pruma giornèda a Falciade l’é stat endrezà i Campionac taliegn di Joegn che i à registrà n gran suzess per Alessandro Chiocchetti Pelin da Moena, clas 2001, che se à vadagnà l titol talian te la sprint a tecnica classica Under 20.

N gran bel suzess per l joen atlet cresciù te l’U.S. Monti Pallidi e anchecondì del grop sportif Fiamme Gialle: te n finèl dassen sprint Alessandro l’é stat bon defat de despassèr Matteo Ferrari, ence el del 2001 de le Fiamme Oro e del Ski College de Fascia, ruà dapò al 3° post. Te la classifica finèla anter i miores troon ence Giovanni Ticcò, clas 2000, ence el da Moena ex Monti Pallidi e ades de le Fiamme Oro, che à arjont l 5° post.

Venta ladina ence anter la eles categorìa senior, con la moenata clas 1995 Caterina Ganz de le Fiamme Gialle sul sciaier più aut del podie e al secondo post Anna Comarella del 1997 da Ampez de le Fiamme Oro. Chiò amò al 4° post troon n’autra moenata, Alice Canclini clas 1994 de l’Eserzit.

Convoché ai Mondièi Juniores

I bie resultac arjonc ge à fat vadagnèr a Alessandro Chiocchetti ence la convocazion per i Mondièi Junior en cors, che jirà inant per duta chesta setemèna te la Germania. A Oberwiesenthal l’é la garejèdes de paslonch, olache ensema con Chiocchetti l’é stat convocà ence Giovanni Ticcò ti Juniores e Anna Comarella ti Under 23.

Semper a Oberwiesenthal l’é la competizions de saut e combinazion nordica, che veit anter i partezipanc Annika Sieff del Ski College de Fascia, che tol pèrt te duta does la disciplines.

Dai 5 ai 14 de mèrz a Narvik, te la Norvegia, sarà enveze la garejèdes de schi alpin, a cheles che tolarà pèrt ence Monica Zanoner, che l’an passà aea cognù renunzièr a garejèr te cèsa, ensema con i ladins Alex Vinatzer e Tobias Kastlunger, che enveze su la neif fascèna ai Mondièi 2019 i aea arjont i prumes piazamenc.

Foto: Alessandro Chiocchetti da Moena te mez, con Fabrizio Poli e, a dreta, Matteo Ferrari del Ski College de Fascia.

 (lg)