La Usc di Ladins

Do la ediziun zero dl ann passé, él sté en sabeda ai 10 d’otober la pröma ediziun ofiziala dla gara da salté "Enrosadira Trail", desfirada sot l’organisaziun dla Uniun Sport La Val en colaboraziun cun la Cooperativa Turistica Alta Badia, y cun le sostëgn de nia manco co 100 volontares y volontars. Indöt podôn chirí fora danter trëi percursc. Le plü sfadius ê zënzater le "Ultra" de 55 km, cun bëgn 3.400 metri de deslivel. Na dërta sfachinada se fajôn ince sön le "Marathon" de 40 km cun 2.450 metri de deslivel, tratan che le manco rî ê le "Experience" da 20 km, cun 1.250 metri de deslivel.
La devënta tla gara "Ultra" ti é jüda pro i ëi – cun 101 classificá – a Stefano Rinaldi dla Runaway Milano ASD, che á taié le travert do 6:01.13 ores de saltada. Pro les ëres á davagné Miriama Masarikova dla Slovachia cun 7:16.29 ores. Na devënta di "Gherdëina Runners" án indere odü sön le percurs mesan (83 classificá), olache Luca Clara á taié le travert por pröm cun 3:55.46 ores. Y n terzo post ladin él garaté tla 20km dles ëres, cun la medaia de brom de Annalisa Pitscheider de Badiasport.

Deplü sön la gara y ci che i organisadus dij, podëise lí t’La Usc di Ladins di 16 de otober  (pablo)