La Usc di Ladins

Dai 30 de setember ai 8 de otober te dut l Trentin Südtirol se dejouc la 9^ edizion de la Setemèna del Azet, con passa 70 evenc e autra scomenzadives te duta la region.

Chest an l tem l é la cèsa, che tropes no i troa percheche i vegn da dalonc, i à problemes economics o personèi, o percheche istituzions, politica e comunanza no tol dezijions ascortes. Coscì nesc joegn i cogn se n jir fora de val e aon cèses de foresć serèdes diesc meisc al an.

Ma ‘cèsa’ no vel dir demò frabicat, l é dut chel che pel fèr ‘stèr ben’ te na comunanza che tol ite, che recognosc l valor de ogne persona, che la é bona de creèr relazions e de soscedèr l sentiment de partegnuda.

Sun chisc temes ence l Comun General de Fascia met a jir na lingia de evenc, che pea via en sabeda ai 30 de setember da mesa les 3 domesdì te Chino Marmolèda a Cianacei, olache vegnarà portà dant l program e stimoi per pissèr a chest argoment, e prejentà l projet de turism inclusiv TRAME.

De più su La Usc stampèda de vender ai 29 de setember.





 (Lucia Gross)