La Usc di Ladins

L é dalbon n pecià che canche se rua ti Munciogn sie dut serà. Coscita ne segnalèa l istà passà na sentadina, portan dant n dejèje che vegnia palesà da n muie de etres, fascegn e foresć. Enlouta l capofrazion de Poza Bernardino Zulian de Cuz ne aea dit che la gestion, che ge era stata data su a la familia Brunel de Boc da Moncion, l'aessa cognù jir fora con l invern del 2025, ma i gestores per sia rejons i aea dezidù de serèr su l contrat dant dal temp. Da enlouta la Frazion de Poza à metù fora etres doi avisc per dèr su la gestion, ampò no se à perferì nesciugn che responea a la condizions pervedudes: l é da recordèr che per poder ciapèr i contribuc de la Provinzia la gestion cogn esser touta su da n bacan, e bachegn n é semper de manco. Coscita la Malga Munciogn é restèda serèda ence chest invern.
Chesta situazion no joa a nesciugn, ne al turism e a la comunanza, ajache mencia n servije te n lech n muie aprijià per se fèr na raida e, n'outa rué su, poder su refizièr con vèlch da beiver e da magnèr, ne al ambient e nience a la casses de la Frazion, che la ge jonta l fit per dut l an.
Ades se va pian pian encontra al istà e l é de besegn de troèr na soluzion ence per l bestiam che vegn monteà.
Ai 7 de mèrz l'ASUC de Poza à donca metù fora n auter avis per dèr su la gestion: la perferides cogn ruèr ite dant dal mesdì de en lunesc ai 7 de oril; chi che à enteres i pel tor contat con l ofize de la Frazion, te Comun de Sèn Jan, o col capofrazion Bernardino Zulian, per jir a veder i lesc e aer duta la informazions.

De più su La Usc stampèda de en vender ai 21 de mèrz.

 (Lucia Gross)