La Usc di Ladins

Te chesta litazions che à vedù ence te Fascia n smendrament de candidac e listes respet a jai 5 egn (da 18 listes se é passé defat a 12) se sent stroz pecia gaissa, e chest soraldut ti Comuns olache l é demò una lista. A Moena, a Soraga e a Ciampedel, olache de setember del 2020 se aea metù dant 2 listes (a Ciampedel adertura 3), chest’outa l é demò un candidat ombolt, che va inant sul troi di ultimes 5 egn: a Moena Alberto Kostner, a Soraga Valerio Pederiva e a Ciampedel Alessandro Bernard, jà vizeombolt che à ciapà l testamonech da Ivo Bernard. A Sèn Jan adertura la soula lista per la conferma del ombolt Giulio Florian la tol l post de 4 listes che jai 5 egn sostegnia, 2 per man, Florian e Lara Battisti. A Mazin l panoram l é enveze valif al 2020, doi listes per i medemi doi candidac ombolc: da na man Fausto Castelnuovo che à ret l Comun ti ultimes 5 egn e da l’autra Manuela Spinel che à fat 5 egn de oposizion sterscia. Demò a Cianacei l confront se à empeà: de contra a Giovanni Bernard, soul candidat jai 5 egn, se à metù dant Roberto Guglielmi.

La sezions litales sarà avertes en domenia ai 4 de mé da les 7 da doman fin les 10 da sera. Per litèr se cogn se tor do la tessera litala (se zachei l’aessa perduda i pel la domanèr tel ofize del Comun che chel dì resta avert per chest) e n document de identità.
Duc i fascegn che va a litèr i ciaparà, apede a la zedola per sie Comun, ence chela per l Comun General de Fascia.
Per litèr se pel meter la crousc sul inom del candidat ombolt (o procurador) cernù e/o sul simbol de la lista che l lo sostegn. Se vegn segnà demò la lista la stima va automaticamenter ence al candidat ombolt o procurador. Apede al simbol de la lista cernuda se pel dapò scriver fin a 2 inomes (zenza vincol de gener) cernui anter i componenc de la medema lista. Se pel cerner demò una lista e scriver demò inomes che fèsc pèrt de chela (no se pel scriver inomes de autra listes ence se i sostegn l medemo candidat procurador).
Recordave che litèr l é n derit, ma ence n doer!

Su La Usc nr 16 dai 2 de mé podede troèr i inomes de duc i candidac, lista per lista. Se pel la troèr te la boteighes de sfoes de la valèdes ladines.  (Lucia Gross)