Cun la costruziun dla "Riggertalschleife" vëgn la valada de Puster coliada i proscims agn diretamënter ala linia dla ferata dl Prener. Le travert é chël da avëi a ost dla provinzia n coliamënt diret, zënza messëi baraté – sciöche ara é cina ciamó a Franzensfest. Por l’assessur Alfreider se tratera de n laur che pitará na dërta alternativa y portará pro da alisiré insciö la strada de Puster, che vá sot tl trafich. L’assessur spliga: "Sce an pëia ia cun la ferata da Puster demez, por jí tla Val d’Isarch o a Balsan, pón se sparagné 17 menüc. Insciö pón ince fá orars plü stabils y aumenté la puntualité di coliamënc." Tratan i laurs de costruziun dessel ince gní lauré pro la linia dla ferata de Puster, danter Franzensfest y Bornech, olache al é preodü da fá mioramënc sön la tecnica y por la segurëza. Indere: por fá i laurs mëssel gní stlüt la linia dla ferata, y chësc por n ann intier. Preodü él da stlü la trassa tratan l’invern 2024 y la tigní stlüta por döt le 2025. La Provinzia impormët che al sará n sorvisc sostitutif cun corieres, "che dess respogne le miú che ara vá ai bojëgns dla popolaziun." Impó ne manciarál nia les groaries, che an ó sambëgn limité le plü che ara vá. Porchël vëgnel bele sëgn traté y rajoné cun les istituziuns, les scores, i operadus dl turism y les assoziaziuns de categoria. Alfreider injunta: "I orun ince trá ite la popolaziun te chësc prozes, tolon ite la minunga di passajiers y sön chësta basa pité cun les corieres le miú sorvisc che ara vá".
N ann zënza ferata de Puster
Dlungia la costruziun dla "Riggertalschleife", che pitará le coliamënt diret danter Puster y Balsan, gnarál ince fat laurs de renovamënt sön la trassa dla ferata de Puster. Porchël sarára stlüta da Bornech cina Franzensfest n ann intier
Galaria retrac
View the embedded image gallery online at:
https://www.lausc.it/valedes-ladines/val-badia/26642-n-ann-zenza-ferata-de-puster#sigProIdbdaa109086
https://www.lausc.it/valedes-ladines/val-badia/26642-n-ann-zenza-ferata-de-puster#sigProIdbdaa109086