La Usc di Ladins

L’èlba de la fotografia, l’èlba de n ensomech che à didà descorir l valor universèl de la Dolomites e a les jontèr ite te la lingia de l’arpejon ‘Patrimonio Mondiale: l é la mostra »Franz Dantone Fotografo delle Dolomiti (1839–1909) - La nascita di un immaginario collettivo« che é stata orida en mercol ai 24 de oril a Palaz Trentini tel chèder del Trento Film Festival.
Se trata de n event nasciù da la colaborazion anter la Fondazion Dolomiti UNESCO e l Istitut Cultural Ladin Majon di fascegn, co la curatela de Davide Baldrati, en ocajion de la 72eisema edizion del Trento Film Festival. La mostra, che sarà da poder veder fin ai 16 de mé, patrozinèda da la Presidenza del Consei de la Provinzia Autonoma de Trent, la consent de veder 100 stampes fotografiches originèles da enlouta, de chestes 6 de proprietà del Istitut Cultural Ladin de Fascia e 94 de la familia Dezulian, che la les à tegnudes su dai egn Trenta del Nefcent, canche la ge é jita sora dant che les vae destrabonides. Vegnarà metù fora, amò apede, 30 fotografies stampèdes a inchioster da riproduzions digitèles fates da la lèstes restaurèdes a cura del Istitut Cultural Ladin col finanziament de la fondazion CARITRO.

La mostra resta averta duc i dis enscin ai 5 de mé da les 10.00 a les 13.00 e da les 14.00 a les 19.00 e dai 6 ai 16 de mé dal lunesc al vender col medemo orarie e de sabeda demò da doman. 
Sarà ence l’ocajion per na ciacolèda dal titol »Risonanze dolomitiche – quando il sublime interroga l’uomo«, en lunesc ai 29 de oril da mesa les sie da sera te la stua leterèra te Piaz del Dom a Trent. Pontan via da la naa del paradigm estetich de la Dolomites, l filosof Paolo Costa, l’architeta Loredana Ponticelli e l fotograf Davide Baldrati rejonarà de spiritualità, estetica e etica de la esperienza umana a le aute. 

De più su La Usc stampèda de en vender ai 26 de oril.