La Usc di Ladins

Cun l’ann nü á ince metü man la sajun da d’invern tla Ciasa dl parch natural a Al Plan, che strotöra che sorvësc zacô da zënter de informaziun por ci che reverda la flora y la fauna tl parch natural Fanes – Senes – Braies, sciöche ince zënter de sensibilisaziun por le patrimone de nosc ambiënt y le dër comportamënt che chësc se damana. Daurida ofizialmënter ai 9 de jügn dl 2001, él deventé na strotöra importanta por Mareo y por le parch natural; dl ater vers ésera cun le tëmp ince rovada ti agn,ci che se lascia ince sintí sön le numer de vijitadus. Dl 2018 n’ân ciamó cumpedé passa 13.300, l’ann passé n’án albü püch plü co 7.200 (feter mile deplü co l’ann denant). Chësc mostra ince che la ciasa, la mostra, la oferta ess debojëgn de n renovamënt, de na sbürla de novités.
Na picia novité che dess n iade garaté chësc ann é l’ampliamënt dl’entrada dla Ciasa, olache al é preodü da fá pormez n salamënt dlungia l’ingres, che dess sorví sciöche lerch da tó ite les porsones, mo ince por mëte jö na gardaroba y zacotan de armá olache i vijitadus pó lascé jö sües cosses personales (p.ej. ruchsoc) tratan les vijites.

Deplü sön le proiet ciafëise t’La Usc di Ladins di 8 de merz  (pablo)