La Usc di Ladins

Por i cristiagn é la Carsëma un di tëmps stersc dl ann liturgich. Porchël sinton contan deplü che an ne pó nia s’abiné te dlijia por festejé deboriada mësses y funziuns. An proa da colmé chësta locia tles manires plü desvalies. Ploanies che l’á, ciara da anuzé le Radio de Ploania. Ince la Diozeja de Balsan/Porsenú dá sëgn n segnal y pitará porchël la poscibilité da ti ciaré ala mëssa dla domënia en "streaming", ó dí online. La santa mëssa cun le Vësco sará da odëi vigni domënia dales 9:00 da doman. Ti ciaré pón sön Facebook sot a www.facebook.com/radiogruenewelle sciöche ince sön la plata internet www.stol.it.

Ciampanes sona 10 menüc alalungia
Le vicar general siur Eugen Runggaldier á ince invié i proi da lascé soné les ciampanes. An les aldiará porchël vigni domënia dales 12:00, dötes adöm, diesc menüc alalungia. Iló é i fedei inviá da perié les Aimaries (Agno dl Signur). Les ciampanes sonará ince en la festa de Sant Ojöp Laurant ai 19 de merz y en la festa dl’Anunziaziun dl Signur ai 25 de merz. Le sonn dles ciampanes dess alzé fora le lian danter i fedei y ester espresciun dla crëta te Chëlbeldî, ince te chësta situaziun nia saurida.  (pablo)