La Usc di Ladins

Por le stat é Südtirol ciamó ofizialmënter raiun ghel, cun le prigo plü bas, mo tl Südtirol él bele feter 30 comuns che la Provinzia á detlaré raiun "cöce", cun limitaziuns plü strëntes. Danter i criters che vëgn tuc ca él le 10 pormile de caji atifs sön döta la popolaziun, le svilup epidemiologich di ultims dis y la presënza söl teritore de strotöres cun porsones a risch. Danter i comuns ladins él chël da San Martin che manacia da odëi "cöce". Te döt le comun él al momënt 16 caji de porsones atualmënter positives, tratan che le 10 pormile dla popolaziun oress dí al plü 17-18 caji (popolaziun de 1.767 ai 31.12.2019). Lapró é düc i caji nüs gnüs pormez dai 29 d’otober incá. Y terzo critér: söl teritore él na strotöra zitia por le virus – la Ciasa de Palsa. Dit en cört: sce al vëgn ciamó caji lapró, podess San Martin tosc odëi "cöce", che ó dí p.ej. che an pó ma jí fora dl comun por rajuns de laur, sanité o nezescité,

Les zifres dles ultimes 24 ores
Tl Südtirol él gnü pormez tles ultimes 24 ores 712 caji nüs de infeziuns da coronavirus; 10 é ti comuns dla Ladinia: 3 tl comun de Corvara, 1 tl comun de Badia, 4 tl comun da San Martin, 1 tl comun de Urtijëi y öna tl comun de Santa Cristina.

1.211 varis
Ti reparc normai di ospedai de Südtirol vëgnel sëgn medié 270 paziënc (+3), tles cliniches privates 86 (+18), a Gossensass n’él 89 (+2) y tla terapia intensiva 35 (+2). Cater porsones é indó mortes por o cun coronavirus. Tla statistica resultëiel ince 1.211 porsones varides. Le numer é tan alt, deache al é gnü apliché le criter nü, cun chël che an resultëia varis bele cun 1 n PCR test negatif. Denant n’êl 2.  (pablo)