La Usc di Ladins

Steve Jobs, l cofundadëur dla Apple Inc., ova dan 14 ani ulù nes dì che si firma ova nventà l prudot dl daunì. L prim iPhone fova unì prejentà ntan la manifestazion "Macworld" a San Francisco ai 9 de jené dl 2007. Da chël di inant ne fossa nosta vita mei plu stata la medema. L smartphone ie deventà na pert de mpurtanza fundamentela tla vita persunela y prufesciunela dla majera pert dla jënt. Cun n svilup for majer y majer dla nteligënza artifiziela, arons ti proscimi ani dessegur mo d'autra surprejes tl ciamp tecnologich, ma l ne fossa pa nia tan fauz a dì che belau dut ie scumencià n chël di dan 14 ani canche Steve Jobs à prejentà l iPhone, l prim, un di piunieres dl smartphone sun l marcià mundiel.