La Usc di Ladins

Cortina é chestes edemes tla atualité internazionala, per merit di Mondiai de schi. Te puec agn, dl 2026, sarà Milan – Cortina sun i slefs de mez l mond per les Olimpiades invernales. Ma Cortina é de plu che demé sport y charme, dantaldut stories de jent, y na storia de autonomia dl teritore y de n liam strent tost do l 1500 con i Ladins de Tirol y dut l Tirol. Te chesta ocajion di Mondiai2021 volessi recordé la gran personalité de Bepe Richebuono che nes à lascé dant puec meisc. Con n si pitl liber, dal titul »Sete di libertà e di amore« (seit de liberté y de amour«) nes cùntel, a nos nia zitadins ampezans, la storia de n raion, sia jent, si derc, sia auto­no­mia, si liams con i podeis da Sud y Nord, y destins de persones na outa crudiei na outa plajoui, creden­zes mistiches y naturalistiches, cara­ters durs y freic de vita ti bosc y su per les crodes, spiric anarchics y amours proibis y se­crec... Liejan chest romann de Bepe R. ambienté te Anpezo tl 1500 emparen y ren­frescheien ben feter dut cie che un/a à da savei canche al rajona de Anpe­zo, sia storia dret vedla y sia jent. Ence i tele- y radiocronisć dles gares de Copa dl Mond, Mondiai y Olim­piades dessa lì chest pitl liber de Richebuono, olache al é laite da ciafé fi­na­mai la nasciuda y cariera dl artist Tiziano, i liams de Anpezo con Col y Neustift, con Aunejia y Puster. L autour Richebuono dà te chest bel liber ence n gran segn de respet per les eles y l amour che chestes viv y dà, les salva fora de chela morala popolara che les conda­neia per libertés y senti­menc amo­rousc che ales viv. L liber »seit de liberté y de amour« é scrit per talian y dé fora da »Manfrini edizioni«, al audissa te vigni scola dles valedes ladines y sudtiroleises sciche letera­tura, storia, soziologia...
Bepe Richebuono nes à dé tant truep, y si gran stude y savei nes àl arpé te plu publicazions, te cheles che al và a fonz per cherì motivazions y respostes a les evoluzions storich – culturales che fej pert oramai de n temp passé che essa ence podù jì autramenter. Nos son fac da la storia, i son »fioi« dla storia. Per vedei ite olache i jon, messonse capì chi che i son, da olà che i gnon. Nos podon aldidancuei ester protagonisć de nosta storia, tles libertés, responsa­beltés y ence competenzes che i on, zenza che i nes desmentionse mai – sciche Bepe Richebuono dij – la Providenza Divina che nes dà respos­tes ence ti temps plu pericolousc y sfadiousc. Te chisc temps che i vion vedonse tant pitli che i son y de cie che i on endò debujen: de respet per i autri, per la vita y per la sanité che é na gran scincunda!  (de Iaco Rigo)