La Usc di Ladins

L assessëur per la cultura ladina Alfreider à auzà ora: "L cuncors leterer ie stat una dla scumenciadives plu nteressantes metudes a jì tl ciamp culturei ti ultimi ani. La grupa linguistica ladina ie l plu vedl de nosta provinzia y l fej plajëi a udëi che la leteratura ladina ie viva y che l vën for inò docà jëunes y jëuni che à legrëza de mëter sun papier te si rujeneda dl'oma sentimënc y emuzions." Alfreider à rujenà de na publicazion che ne porta nia mé pro a aumenté la dunfierta leterera ladina, ma che reprejentea nce n cuntribut a nosc partimone culturel.
Nce la ntendënta Edith Ploner à lecurdà che chisc proiec "ie de gran valor per nosta rujeneda de mendranza. Ulësse lecurdé Elias Canetti, che à dit che n ie un cun la rujeneda dl'oma, che n ie cieche n tol su dala rujeneda dl'oma y che la rujeneda y ie nsci na pert fundamentela dla persona nstëssa."
L autëur Bruno Maruca à spiegà che canche l scrij stories, se sëntel plu liede de lascé jì si pensieres. L'autëura Nadia Rungger à lecurdà che tla parola "scrì" iel laite nce la parola "crì", y chësc ie per ëila n nvit a scrì.
Pernanche n puderà, fajeràn na manifestazion ufiziela cun publich per prejenté l liber tla miëura maniera.

Deplù tla edizion de La Usc di Ladins de duman vënderdi ai 23 de auril.

FOTO:
Pra la prejentazion dla colezion de stories "Scribo", da m.c.: la cunlauradëura dla repartizion de cultura ladina dla Provinzia de Bulsan Barbara Perathoner, l autëur Bruno Maruca, l assessëur Daniel Alfreider y la ntendënta Edith Ploner (Foto: USP/Fabio Brucculeri).