La Usc di Ladins

Del 2018, per la pruma outa, a cef de la SAT, la Sozietà Alpinistica Trentina, l’é stat lità na femena.

Anna Facchini, trentina ma moenata de adozion, la é stata dapò confermèda te sia encèria trienala tel meis de mé de chest an, canche tel diretif provinzièl l’é stat lità ence n’autra femena fascèna, la presidenta de la sezion CAI SAT Auta Fascia Licia Favé.

En jebia ai 8 de messèl la doi presidentes se à troà te la sala del Consei de Comun de Cianacei en ocajion de la pruma scontrèda coi autores endrezèda da la Biblioteca de Cianacei. Defat l responsabol e academich del CAI, Domenico Volcan, à volù averjer i evenc de chest istà apontin con la presidenta Facchini per rejonèr de tematiches leèdes a la mont.

Te na sera de catif temp, olache i ghesć à cernù de se n stèr te si alberch, no l’é stat besegn che Volcan porte dant la storia del Cai Sat e de sie raport con l’Alpenverein del scomenz del 1900, n tem jà cognosciù dai partezipanc a la scontrèda, soraldut componenc del Grop da mont de la Val de Sora, ma l’é stat l’ocajion per rejonèr de n muie de costions de gran enteress.

La presidenta Facchini à podù coscì prum de dut ge portèr dant ai sozi e ai prejenc n chèder informatif su l’organisazion e la strutura de la SAT, la sezion del CAI più grana de la Tèlia, che la tol ite 87 sezions e l’à desvaliva Comiscions con volontères esperc che dèsc consulenzes tecniches te setores desferenc, per fèr entener l livel de complessità e de competenza che é patrimonie de chesta istituzion.

L’é stat dapò rejonà di percorsc de sostegnibilità per valorisèr l volontariat, de l’emportanza de la femenes te la SAT, de sensiblità desferentes en cont de economia e defendura de l’ambient sa mont, de la restruturazion di refuges e de la manutenzion e la gestion di troes sa mont.

De dut chest se pel lejer de più su La Usc stampèda de vender ai 16 de messèl.  (Lucia Gross)