La Usc di Ladins

Al é n bel sëgn de respet defrunt al ladin, le lingaz plü vedl dl Tirol, sce al vëgn mostré ince fora dles valades ladines. La presënza dl lingaz ladin sön tofles, bandires, scrites é n arichimënt por le Tirol dl Süd y süa storia, por la jënt de vigni lingaz che vir chiló y por les istituziuns politiches, soziales, culturales y turistiches. Podëi avëi dan porta tl Tirol dl Süd (fora dles döes valades de Badia y Gherdëna) n lingaz lapró, autentich y autoctonn, é n punt implü tles ofertes y tla cherta d’identité de döta la provinzia, regiun y euroregiun.
Sentan te ferata y podëi odëi che al vëgn comuniché ti videos ince por ladin les informaziuns ofiziales y ince chëres dl Museum dla Natöra da Balsan fej na gran ligrëza a edl y cör, y desmostra  tlermënter che adoré deplü le ladin (ince ma te na picia mosöra) a livel general dl Tirol dl Süd n’é degun dann y ne ti tol a degügn la lerch y l’atenziun. L’ejëmpl tles ferates podess fá scora, sperun che al sides la sensibilité y l’orenté ince te d’atri ciamps altró, publics y privac!  (Iaco Rigo)