La Usc di Ladins

Catercent persones, dutes cheles che podea vegnir loghèdes ju te condizions otimales tel ciamp sportif de Cianacei, se à emprevalù en domenia ai 31 de messèl de la bela ocajion sporta dal paisc ai ghesć e a sia jent, ruèda dassen en gran numer da duta Fascia, de scutèr l conzert de Roberto Vecchioni.

Te la cornisc da marevea del Gran Vernel l é stat Michela Marangoni de la sociazion Antermoa, che la se cruzia de la direzion artistica di evenc te la Val de Sora, a orir la sera endrezèda adum con Ensema per Cianacei, aministrazion de Comun e APT de Fascia e col didament del scritor Matteo Cavezzali tel chèder del Scrittura Festival Dolomiti.

Do l salut del ombolt Giovanni Bernard l ciantautor à tacà dijan: »Chest l é n conzert demò per Cianacei, no l é desche i etres… i à dit che ve sciudaré l cher, ma me chi él che me sciauda? Gio é ence na età… « e defat te la sera belebon frescia l à ence cognù domanèr adimprest n colet più ciaut.

L publich no à scutà l freit, l se à lascià menèr dal musizist professor, che ence te si conzerc l tol l’ocajion per dèr messajes e rejonèr de cultura, de vita, de amor e de emozions. 

De più su La Usc stampèda de vender ai 5 de aost.  (Lucia Gross)