La Usc di Ladins

Ai 8 e 9 de jugn saron chiamé a litar a ‘sufrage universal’ per l renovo del Parlament european.

Con passa 400 miliogn de persone che lita, la é conscidrada la seconda maor litazion democratica del mond. Se cogn cerir de sensibilisar i sentadins europeans sun chest apuntament col ge recordar che do da la seconda vera mondiala l prozes de integrazion europeana à creà daite de se le condizion per la pasc. Vegn sostegnù defat le vijite ai ciampes de conzentrament e de sterminie nazifascisć per renovar la memoria di orores che à ciapà ite l’umanità te chel trat de temp e vegn zelebrà con desvalives evenc la giornada de l’Europa dai 9 de mé.

Dut chest àl amò valuta per crear n vero enteres sul davegnir de l’Union europeana? Ben segur, ma no l é assà lurar e seghitar a se vardar en do. Ge vel vardar segures inant. Se à slarià fora l’idea falada che l’Union europeana sie na entità che à arjont sie stat de realisazion definitiva; la circolazion ledia de le persone, de la marcianzia, l’Euro moneida che se pel durar te vint Stac UE; sentir rejonar de le desvalive politiche europeane trasmet chesta sensazion. Te la pratega per far a na vida che l’Union sie n soget giuridich tel pien de si poderes, la strada da far la é amò longia. 

De più su La Usc stampèda de en vender ai 8 de mèrz.  (Massimo Girardi)