La Usc di Ladins

Suns Europe compiesc 10 egn e l chier de neves musizisć per la neva edizion. L Festival de la èrts di lengac mendres de l’Europa, endrezà da la cooperativa Informazion Furlana, editora de Radio Onde Furlane, col sostegn finanziarie de l’ARLeF (Agjenzie Regionâl pe Lenghe Furlane), de la Region FVG, e de etres enc publics e privac locai e internazionèi, se tegnarà a Udin e te etres lesc del Friul tel meis de otober che vegn.

Chisc dis passé Suns Europe à metù fora l bando che revèrda en particolèr la sezion musicala del festival e l se ouc a gropes e autores che fèsc musega tel lengaz de mendranza, ge dajan visibilità a la produzions più originèles e inovatives. 

Duc i enteressé é envié a scriver ite l formulèr online sul sito www.sunseurope.com dant dai 30 de oril e manèr duc i materiai che vegn domanà. La selezion vegnarà fata dant dai 30 de mé, chi che tol pèrt al bando ciaparà na comunicazion per mail.

I artisć selezioné vegnarà envié a portèr dant si toc musicai en ocajion de la finèla del festival che sarà a Udin de otober. L’organisazion chierirà de ge dèr l met ai artisć de prejentèr sia produzion musicala ence endèna autra ejibizions del festival. Per maor informazions se pel scriver na mail a info@sunseurope.com. Musizisć ladins, fajeve inant!