La Usc di Ladins

N mierculdi ai 27 de dezëmber dl 2023 à n’ëila perdù cuscienza sun la Mont de Sëuc. Ruvei sun l post la àn riesc ciarieda tl joler y meneda tl spedel de Bulsan, da ulache n ie muec de viers dla Val de Fascia, plu avisa tla Val de San Miculau, ulache un dai schi fova tumà se rumpian la rëpes. L ël ie unì menà cun l joler tl spedel de Ciavales.
Sun la Mont de Sëuc à n’ëila abù problems al cuer: n la à perchël monitoreda y meneda cun l joler tl spedel de Bulsan.
Ai 28 de dezëmber à la zentrela cherdà l joler sun l purtoi de Ciampinëi, ulache n jëunn de 13 ani fova frit ora de pista y ova n trauma al cë. N ie julei limpea tl spedel de Persenon.
Riesc do à l sucors alpin de Gherdëina damandà do l joler sun l purtoi dala lueses de Resciesa, ulache na jëuna se ova rot l os dla cuessa do n nzidënt. La jëuna ie unida meneda cun l joler tl spedel de Persenon.
Ntan l jol de reviers tla sënta àn mo damandà do l joler sun Jëuf de Frea, ulache l ie unì sëurandat n ël cun na sciabla ora de luegia che n à menà tla sënta a Puntives, da ulache n l à mo menà inant tla Sportklinik.
Da Puntives àn mo menà a Persenon n ël cun l brac rot.
Ai 29 de dezëmber ie l Aiut Alpin julà de viers dl Ciaulonch, ulache doi dai schi fova fric adum. L plu jëunn ova n trauma al cë y al cervel y ie unì menà cun l joler tl spedel de Bulsan.
Riesc do iesen julei sun Plan de Gralba, ulache n’ëila se ova fat mel a tu´m´é cun i schi. Do la prima cures la àn meneda tl spedel de Persenon, da ulache n ie julei inò riesc a Urtijëi per n ël pra chël che l se ova fermà l cuer. L ël ie unì ciarià tl joler y menà tl spedel de Bulsan.
Ntëur la 14:00 àn mo damandà do l joler sun la Mont de Sëuc, ulache n’ëila se ova trat na sciabla ora de luegia - n ie julei limpea tl spedel de Persenon.
A Santa Cristina se à n’ëila fat mel al os dl spinel: l Aiut ie stat riesc sun l post y ie julà limpea tl spedel de Bulsan. Tl medemo spedel àn menà nce na jëuna de 17 ani che ova perdù cuscienza sa Risacia: la grupa dl Aiut Alpin à riesc metù man cun la reanimazion y tosc do fova la jëuna pra sé.
Ai 30 de dezëmber ie n ël de Ferrara tumà cun i schi sun Piz Sela se spacan l gremblin: n ie julei limpea tl spedel de Persenon. Sun Jëuf de Sela se à una dai schi rot na giama. Do la prima medicazion da pert dl dutor, la àn meneda tl spedel de Persenon.
Plu inant àn cherdà aiut a Urtijëi, ulache n ël fova tumà dassënn cun i schi se rumpian na sciabla y se fajan mel al piet - l stentova a tré l fla.
Do la prima cures l àn menà cun l joler tl spedel de Persenon.
Ai 31 de dezëmber iel stat n ntervënt dala 10:00 a Colfosch: n ël cun na sciabla ora de luegia ova de bujën de na terapia contra l mel, do chëla che n ie julei limpea tl spedel de Burnech.

N l ann nuef, ai 1. de jené iel jit ite na cherdeda da pert dla zentrela de Pieve: i damandova aiut per sëurantò da n’ambulanza che univa da Cortina ju n pazient de 55 ani che ova bonamënter na sangheda tl cë. L ël ie unì menà tla neurochirurgia de Belun.