La Usc di Ladins

Enstadì l é stat la radunanza anuala de la sozietà sportiva de Moena, la prima vidada da Carlo Ganz, che l aeva tot su la direzion tel uton del 2020.

Enceben che le regole prevedude da la costion sanitara le abie condizionà dut e duc, l an tanche passà l é stat n an rich de atività che à vedù l diretif e i tropes volontadives empegné te più setores; demò i corsc de schi alpin no agonistich i à cognù esser lascé su, ma i é stac rempiazé da na miora organisazion di corsc de paslonch.

Te sova introduzion l president, rengrazian chi che se à dat ju en te chisc mesc, l à rejonà de na sozietà sana da duc i ponc de veduda, averta a tor su idee e a meter a jir desvalive scomenzadive.

L à recordà ence che la sozietà la ge é jita encontra a le familie, te n moment economich de segur nia sorì, col sbassar l cost di corsc sportives, soraldut chi del invern 2020.

L à recordà dapò che la Fiorentina, che d’istà la vegniva a Moena da nöf egn en ca, e che tel 2020 no la se aeva prejentà, l à endò viventà l paes e la valada entiera te la seconda metà del mes de messal del 2021, con aprejiament de la squadra enstessa e de l'APT.

L é stat dapò prejentà le relazion di referenc di setores - schi alpin, paslonch, atletica e balon e en ultima la direzion de la Monti à volù ge sporjer n ringraziament a persone che à aidà a tegnir su l inom de la sozietà.

De più su La Usc stampèda de vender ai 19 de november.


 (NC)