La Usc di Ladins

Tratan l'utima findledema él sté a Kranijska Gora, tla Slovenia, trëi dis de gares de Spartan Race, por dötes les categories de eté y ince mituns y mitans á podü garejé. Por i gragn él gnü organisé n »Trifecta Weekend«, chël ó dí che i atlec y les atletes â la poscibilité da tó pert ales competiziuns de düc i degrá de dificolté: Sprint 5km, Super 10km y Beast 21km y se cualifiché por i campionac mondiai che sará a Sparta, tla Grecia. L'atlet de Spartan Race da La Ila, Luca Pescollderungg, á tut pert ala gara plü döra, la 'Beast', rovan al secundo post. Pröm é rové l'atlet profescionist franzesc Jeremie Gachet. »I savô che i ne ê nia al top de mia condiziun, mo i sun sté bun da tigní bot cina al 12ejim chilometer. Iló á les iames metü man da de do. Impó sunsi té bun da rové secundo. Sëgn mëssi me conzentré sön la proscima competiziun, la 'Hochkönigman'«, nes cunta Luca. Ara se trata de na gara de copa dl monn de skyrunning che sará ai dai 3 ai 5 de jügn a Maria Alm, tl'Austria. Al sará na gara dër impegnativa, de 32 km, cun 2.700 metri de deslivel.  (kp)