La Usc di Ladins

Le zënter de paslunch "Sciarè" a San Ciascian é chësta fin dl’edema sot al sëgn dl biatlon jonil. La sabeda y domënia ai 16 y 17 de merz vëgnel organisé le "Drei–Ländervergleichskampf" de biatlon, o le "torné dles trëi naziuns", olache al se mosorará passa 130 atletes y atlec jogn y jonins. L’inom dla competiziun vëgn dai teritori che tol pert: al é atlec de Südtirol, dl’Austria y dla Germania – lapró vëgnel invié sciöche ghesć ince atlec dla Svizera. Tratan che al é bele incö i alenamënc ofiziai, sará spo les gares tratan la fin dl’edema. Le start dles competiziuns é preodü intrami i dis dales 10:30 (l’orar pó mudé aladô dles temperatöres), les premiaziuns é la sabeda dales 14:30 y la domënia do marëna. La jënt é sambëgn inviada da gní a ciaré pro.
Le "Drei–Ländervergleichskampf" é na competiziun dolarata jona, che á albü so debut dl 2022 te Paiern y l’ann do spo tla Svizera. La ediziun de chësc ann ess pordërt messü ester fora en Tirol, mo por mancianza de nëi án messü mudé program. Pormó dan püces edemes á i responsabli dl Alta Badia Nordic ciafé la domanda ofiziala y á ala fin tut la dezijiun da surantó l’organisaziun dl evënt (a Südtirol i éssera pormó toché dl 2025). Jones y jonins podará insciö se mosoré tl scenar spetacolar danter i crëps dles Dolomites.  (pablo)