La Usc di Ladins

Con Sènt Antone da la ciampaneles vegn desleà l Carnascèr. L’é temp de matitèdes, de sauc e pirlèdes… Ma dant de pissèr a se goder con faceres e mèscres, l’é pa da festejèr l Sènt de Dèlba.

En vender ai 17 de jené se taca ite con la messa grana ofizièda da don Mario Bravin da les 11.00 te gejia de Sènt Antone, sobito dò n pìcol bocon e zeche da beiver per duc chenc. Te chesta ocajion, descheche à fat saer l capofrazion Olivo Micheluzzi, vegn ence prejentà la neva Ape de la Frazion de Dèlba.

Dapò sarà na bona marena per i sentadins de Dèlba e Penìa te teater apede gejia con l’estrazion di numeres de la ola de la fortuna. Da sera, entorn les 21.00, la sègra jirà inant te piaz de Dèlba con musega e zeche da ciaut per duc. Duc é envié a festejèr con i sentadins de Dèlba e la touses amò da maridèr no cogn se fèr sciampèr l’ocajion per jir a veder se l Sènt ge cigna.

Con Sèn Bastian, en lunesc ai 20 de jené, se jirà ite tel vif tel Carnascèr. Da les 10.00 vegn dit messa grana te gejia de Penìa, dò messa sarà n mezmesdì per duc, domesdì da les 15.00 la gara del mior grostol e da les 18.00 semper te la veia scoles la ola de la fortuna. 

Da les 20.30 l Grop de la Mèscres de Dèlba e Penìa portarà dant sia pruma mascherèda de de l’an, l’à per titol »Piere dal Polver e l pat col malan«e la é stata scrita da Simon de Giulio. Chesta mascherèda vegn portèda dant ence en jebia grassa, ai 20 de firé. 

Ai 8 e ai 25 de firé enveze vegnarà spilenà la mascherèda de Fabio de la Menina dal titol »Bricons e galantomes«. Duc vegn envié a mascherèda per se fèr cater grignèdes e se les sentir dal Bufon che desche da tradizion ruarà sutan te stua con apedejù l Laché e i Marascons.


 (mci)