La Usc di Ladins

Nesciugn ge cherdea, e i à cognù ge stèr dò n pez e la paissèr dis e nets per entener zacan che bestia che l’era chela che chisc dis passé à fat dans da no creer. I lo aea anunzià te la sescions forestèles che l’era stat vedù la pedies ence te noscia val, ma fazile nesciugn ge à dat fe. Pedies coscita granes e fones da fèr tema demò a ge vardèr, olache la é ruèda l’à fat frasa rasa, l’à derenà troes, l’à desgrejà piantins, la se à slapà gialines e cunìe, la ge à tacà perscin ai pèi di impianc portamont…

Ma che raza de bestia él pa chesta? L louf no fèsc dans coscita marché sul teritorie, no pel esser auter che l porcel salvèrech! 

L conseier de procura del Comun general de Fascia aea domanà, te n sie comunicat manà fora amò de jené, che chi che lo aessa vedù ge fae a saer sobito. E l’é stat sepolì dai messajes e da la chiamèdes al telefon, l’é stat ence jent che se à tout la fadìa de jir personalmenter fin sun Ciampac: se cogn fèr vèlch, l’é de besegn del »contegniment« i ge à dit duc!

Defata i à metù ensema n grop de giagres, i più ardii de la val, ma che fèr, co se mever, che tenetes durèr?? Ge vel spetèr la deroga provinzièla ai criteries ordenères che disciplina la ciacia al porcel salvèrech – ne à dit l conseier de procura. Endèna però da vèlch net i ne à dit che se sent schiopetèdes, podessa esser che i se enjigne a fèr Carnascèr, ma nos pisson che i podessa aer avert la ciacia. 

Donca, ve racomanon, stajé ascorc chisc dis che vegn che no i ve pete na schiopetèda tel cul. I disc che la é coscita bona la cèrn de porcel salvèrech… e en mercol che vegn l’é Ciapuin e taca la Careisema, e descheche se sà l’é descomanà magnèr cèrn, ence chela de porcel salvèrech!