En domenia ai 31 de mé, per la festa de Pèsca de mé, te gejia de Ciampedel à dit messa da les cater domesdì l Piscop de Trent, don Lauro Tisi. Na vijita no ofizièla, ajache la situazion al moment no la consent che tropa jent la se bine ensema, ma che à volù ge fèr sentir a la jent de Ciampedel la vejinanza del Piscop, soraldut dò la mort del curat don Luigi Trottner ai 13 de mèrz.
Don Luigi l’é stat recordà desche n om che no à mai abù dubies de fe, ajache l’era n om che se fidèa del Segnoredio, che l vivea per Die e che l ge jìa dò a Sia strèda con la orazions. Don Luigi, n ejempie per duc, per no desmentièr che l’é l Spirit Sènt, e apontin te la domenia de Pèsca de mé se recorda sia vegnuda sora i apostoi, a ne dèr la forza e a ne moscèr la strèda per jir inant. Con chesta bela paroles l Piscop à volù ge dèr a la jent de Ciampedel n nef curat: don Mario Bravin; con la speranza che più inant se posse fèr na bela festa duc ensema!
Amò inant te la perdicia l Piscop à palesà sia poura per la situazion che l Covid-19 à portà ence te noscia diozesa. L’é da dir dantfora che l’é stat ence n muie de roba beles, sche l preèr ensema te cèsa con la familia o l se donèr ai etres descheche i operatores à fat ti ospedèi; ma no l’é da desmentièr che ence na dotora de noscia val, Gaetana Trimarchi, la é morta per chesta petorcena.
Articol entriech su la Usc nr 23 stampèda ai 12 de jugn (Ilaria Ragnes)
En recordanza de Don Luigi e Gaetana Trimarchi
L Piscop don Lauro à fat vijita a la comunanza de Ciampedel. Te la messa l’à recordà la doi vitimes del Covid
Galaria retrac
View the embedded image gallery online at:
https://www.lausc.it/valedes-ladines/fascia/12827-en-recordanza-de-don-luigi-e-gateana-trimarchi#sigProId0fde96f8c0
https://www.lausc.it/valedes-ladines/fascia/12827-en-recordanza-de-don-luigi-e-gateana-trimarchi#sigProId0fde96f8c0