La Usc di Ladins

Sarà i antropologs del doman a despieghèr chel che l Covid-19 à mudà te la persones che à vivù chest an besest, dopie 20 che à manà l malan che passarà a la storia desche tragedia de noscia epoca. Endèna no l’é temp de analisèr, che sion amò ite te chesta ona desfortunèda che più se la maledesc e manco joa. L’é enveze temp de contèr, de meter jù i fac un a l’outa, de lascèr la pedies de chel che passon, duc chenc, te noscia vita col couribocia.
Seguramenter, valgugn che à abù n’esperienza particolèra l’é stat i scolees, chi che a la fin de sie percors de scola dò i 5 egn i à abù la matura. E apontin ge lascion ai studiousc del davegnir l compit de entener se l’é stat na esperienza che vèlch à mudà te la generazion, nos volon enveze contèr coche la é stata e per l fèr aon rejonà col referent del liceo artistich de la Scola ladina Domenico Bravi.

Na matura fora de anter, co ède pa podù ve endrezèr?
Domenico Bravi: I ejames chiò da nos i é taché ai 17, che l’era mercol, e i é fenii en vender domesdì ai 26. Nos, tant al scientifich che a l’artistich, sion stac fortuné perché aane na bona lèrga, se podea śirèr belebon sorì. Aon seguramenter vardà de ge jir dò a la normativa statales, ministerièles e de la provinzia: podea vegnir ite te aula demò l bez sotponù a ejam con un compagnador, ge volea aer l couribocia e la sanificazion de la mans. Amò l’era da poder vegnir ite e jir fora con n percors separà. L’é stat fat dut delvers.

Podede troèr l'intervista entrìa a Domenico Bravi su La Usc 26 de vender ai 3 de messèl  (Daniele Verra)