La Usc di Ladins

L’era de vender, ai 29 de messèl del 2011, canche te duta Fascia se aea slarià fora de colp la burta neva che Bruno Deluca, cognosciù e stimà menacrep, om del socors, istrutor de brea e gestor de Refuge Roda de Vael, l’aea abù n azident, bele vejin a la utia: l’era sutà jù da chel parei che l cognoscea beleche adiment e l’aea perdù la vita.

La femena Roberta Silva, col picol Emilio che l’aea demò 2 egn e n’autra creatura amò te gremen, l’aea dit sobito che l’aessa seghità a manèr inant l refuge, che l lascèr fossa stat ge fèr n tort a sie om.

L’é passà 10 egn. Roberta l’à tegnù poz, l’à seghità a portèr inant l’empegn no sorì de tegnir n refuge da mont e crescer doi bec. Tel setor di refuges la se à vadagnà gran conscidrazion e stima e desche mère l’à vardà de meter semper dantfora la felizità de Emilio e Agata e de tegnir vif chel leam con n père che ic no i pel veder, ma che l li vèrda e segur l fossa stolz de ic descheche ic é stolc de el.

Sia storia l’é doventà ence n film, che l regist Andrea Azzetti à portà chest an al Trento Film Festival. »Con il sorriso«, chest l titol del film, l’é stat moscià a Poza, te teater de l’oratorie, en lunesc ai 26 de messèl tel chèder de la scontrèdes del Comitatat manifestazions de Poza coordenèdes e prejentèdes da la giornalista Virna Pierobon, a la prejenza del regist, de Tommaso Bonazza per l Trento Film Festival e de la protagonista.

L’é stat na sera piena de emozion, che a trei dis dal 10° cedean de la mort de Bruno l’à chiamà te sala n muie de jent, coi amisc che se à strent apede a Roberta e ai fies.

Bruno Deluca l’é stat recordà chisc dis sa mont dai amisc menacrepes, e amò doman sabeda, se l’é bon temp l vegn recordà con na messa sun Vael da les 11 o da sera da les 6 a Poza. 

La scontrèdes del Comitatat manifestazions de Poza con Virna Pierobon va inant en lunesc ai 2 de aost te piaz de Comun de Sèn Jan con Fernando Brunel, un di maores esponenc de chel jir »Dò l troi de la reijes ladines« che ge dèsc l titol a la rassegna.

De più su La Usc stampèda de vender ai 30 de messèl.  (LG)