La Usc di Ladins

L é temp de pissèr a la iscrizions di bec a scolines e scoles. La Provinzia de Trent à fissà l termin per la iscrizions a la scolines ai 31 de jené e na dì dant enveze, ai 30 de jené, per l prum an de la populères, mesènes e scola autes. 

La iscrizions vegn fates online, travers l portal www.vivoscuola.it, con SPID, CIE o tessera sanitèra/chèrta provinzièla di Servijes.

Per chel che vèrda la scolines dant dai 31 de jené se pel scriver ite i bec ence al servije più lonch del orarie o al sperlongiament de n meis del calandèr de scola per l istà del 2023. Per se scriver ite a la scolina la families no cogn paèr nia, ge vèl paèr na quota demò per la mensa e per l servije sperlongià. Chesta quota vegn calcolèda aldò del sistem de valutazion de la condizion economica de familia (ICEF). Per l an de scola 2023/2024 la agevolazions del cost vegn calcolèdes en automatich, zenza cogner prejentèr desche i etres egn na domana spezifica al CAF, con la prejentazion online de la domana de iscrizion duran la declarazions ICEF jà desponiboles che se referesc ai valores de redit e patrimonie del 2021.

Per chel che vèrda la scoles l’iscrizion é obligatoria per l prum an de scola populèra e l prum an de de scola auta o profescionèla. Per l prum an de scola mesèna l é de besegn de fèr l’iscrizion demò se l student rua da n auter istitut, ence da scola paritaria. Se l seghita a jir inant tel medemo istitut, per ejempie la Scola Ladina de Fascia, no l é de besegn de l’iscrizion online.

con foto: Bec a la scolina. (archivie Ofize stampa PAT)