La Usc di Ladins

»L liber l é n oget: se pel l meter sun n desch e ge vardèr demò, ma se te l verjes e te l lejes l doventa n mond«. Da chest pensier de Leonardo Sascia l é pontà via ence l projet che met ensema la Biblioteca de Comun de Sèn Jan con l’ostaria Da Carpano. Ai 23 de oril l é la Giornèda Mondièla del Liber e del Derit de Autor e dachelanvia per slarièr fora l’emportanza e l piajer de la letura i se à pissà belapontin de ge sporjer a duc i avantores de la ostaria a Sèn Jan na bela ocajion.

Sun ogne desch de la Ostaria via per duta la setemèna che vegn se podarà troèr na selezion de libres cernui da la Biblioteca per envièr la jent a i verjer, i lejer e i condivider con i etres. E per i picoi letores sarà na sezion duta dedichèda.

Ai 23 de oril donca l é la dì ideèla per tor cà chel liber che aon da n trat sun comodin e fenir de l lejer o jir magari te Ostaria o te Biblioteca. I libres ne fèsc doventèr miores, più algegres e più averc al mond.

De più sul segnificat de chesta giornèda su La Usc stampèda de en vender ai 19 de oril.  (MCI)