La Usc di Ladins

N autra sort de spopolament che peta sech no domà su la mont ma daperdut l é l calà che no se ferma del numer dei preve: i temp che dute le parochie e a le ote incia le fraziogn dei nuos pais i ava n preve domà per ele i é passai da n toch e no somea che siebe le condiziogn parceche i posse tornà. Le nuove vocaziogn i é semper pi rare, nten mondo semper pi secolarizà e che l dà manco importanza a la religion, incia nte le vai ladine che ntei secui passai i à dat tanc de suoi fioi e fie a la Gejia. Ades l é normale che n preve l siebe responsabile de doi, trei, cuater parochie, fin a 19 nte zerti caji, parceche no se pol pi portà inavant l modelo del »preve apede cesa« per duc, come che l é finì l mondo de le picole boteghe, sepulì da la maor mobilità de la jent e da la concorenza dei negozi pi granc.
Se ntel 2004 l eva n duta la diozeji de Belum-Feltre 220 preve,ntel 2014 i eva bele deventai 188 e aldidancuoi i é domà 158. Nosta diozeji la sconta dassen sto problema, sentù ncora de pi dal fato che ntei picui paisc la parochia l é da secui n pont de riferiment per la comunità pi grant che no l ente aministratif del Comune e incia l preve l é un dei pilaster de la vita de la comunità: difati se sen intent delongo se l sa da mete n pe n bel raporto coi parochiagn o no, e prest se n vede le conseguenze. Ja nvalgugn di l vescovo de Belum-Feltre Marangoni l à difati dit che n obietivo de la diozeji l é de mete n pe na trentina de grop de parochie, che i podarave ester ciamai »unità pastorali « o »colaboraziogn pastorali«, con n numer valif de jent e co l’idea, se se zafiarà, de mete doi preve a dispojizion de ogni un de sti grop.

(ciataré l articol intier su la USC de vender ai 26 de marz)

Martino Pezzei