La Usc di Ladins

La trëi banches de Südtirol, Cassa Raiffeisen, Cassa dl Sparani y Cassa Populera, à fat ora deberieda mesures per ti jì ancontra ai privac y ala dites.

Nscila puderà sibe privac che mprejes damandé che l vënie spënt per dodesc mënsc l terminn per paië de reviers la rates dl mprëst, canche chësc mprëst ie de tëmp mesan-lonch.

N auternativa o monce sëuraprò iel mesun damandé l slungiamënt dl mprëst nchin a 24 mënsc, a na maniera che l sauta nce ora de mëndra rates.

Chësta mesures ne custerà nia y l ne unirà niancanó a s’l dé n mudamënt dl livel dl fit, de nteres.

Presupost iel che canche n fej dumanda, dëssel vester stat n "raport uperatif reguler", cun la posizions "in bonis", coche n dij. Chësta sauridanza ne n’ie nia preududa per chëi mprësć che ie bele unii slungei ti ultimi 24 mënsc o per chiche se à te chisc 24 mënsc bele nuzà dl mesun de spënjer una o plu rates dl mprëst. La banches à mpo dit de ulëi valuté de abiné na soluzion monce pra chiche à bele spënt ultimamënter una o plu rates o per chiche se à ntardivà a paië l’ultima rates.
La dumanda prevëija n iter scemplificà. Sambën che chiche à zachei che ti à dat seguranz o n generel garanzies, muessa giapé l bënsté nce da chisc, per fé dumanda te banca.

Chësta mesures fates ora dala trëi banches provinzieles de Südtirol ie, da coche les lascia a l savëi, "na prima resposta ala situazion particulera dl coronavirus. Chësta mesures puderà unì ntegredes da acurdanzes sëuraprò aldò de dezijions dl Guviern zentrel o da scumenciadives purtedes inant dala Provinzia Autonoma de Bulsan, cun chëla che l ie unì nvià via na cunlaurazion strënta per ti dé n sustëni sun mesura al’economia raionela."

David Lardschneider