La Usc di Ladins

Canche i vá da Bornech fora, me sál bel che sce zacai mëss passé ia la strada (olache al n’é nia n semafor) él scialdi i auti che stá chic. Atramënter sunse nos ciaférs te nüsc pici paisc, olache an ne l’á nia cis cun lascé passé ia chi che vá a pe. Iló poste val’ iade sté dlungia strada a d’aspeté. I auti passa, y passa, y passa. "Valgügn me salüda cinamai, mo ne me lascia nia passé", dijô n pere da San Martin che rodâ cun le baghele. A n ater che l’â n iade vagada da passé ia canche al gnô n auto, ti á le ciafér fat i pügns y scraié do parores che ne toca gnanca te internet. I pó ciamó capí sce an se dessëna che jënt vá a pe propi sön strada – ci che sozed tres indó – mo forsc él n bel sëgn da respeté chi che ó ma la passé ia, la strada, söles strisciores. Injomé ne injömon bonamënter nia.  (Pablo Palfrader)