La Usc di Ladins

La nodadoia curida d’Al Plan é bele stlüta da 13 agn incá. Y por la maiú pert él ma plü na orcena. N comples de petun y banda che an á iniann metü man da trá jö. Y al é ince bele cotan d’agn che al é gnü studié y lauré a livel urbanistich por cherié les condiziuns da la trá jö y nen fá d’infora val’ d’ater. La Sozieté di Lifc d’Al Plan á damané do plü stüdi d’architetöra da mëte dant propostes y ala fin él gnü cernü le stüde "Berg und Tal" da Bornech, che á rodunt incö publiché i renderings de co che döt le comples podess n bel de ciaré fora. I messun tó ca le condizional, deache i plans mëss düc ciamó gní aprová tla comisciun dl frabiché y sciöche an sá, é n iade döt chit por gauja dl "coronavirus". Dai renderings ciafon porchël ma na idea. Döt adöm él plü frabiches despartides, te chëres che al dess rové ite n iade i cuatiers privac y düc i ofizi dla Sozieté di Lifc y dla Fujina Eletrica (döes ciases söla man ciampa), tratan che söla man dërta él le gran residence de categoria alta cun areal wellness (la nodadoia che stá fora tla pert alta), cun dessot bar y restorant. I auti ón düc mëte sot tera ite, te n gran garasc sot le comples de frabiches ite.
I tëmps depënn sambëgn dal’aprovaziun, mo ince da n ater proiet, chël dl toch nü de scolina. Sciöche La Usc á bele scrit, á le Comun fat n contrat de barat cun les döes sozietés privates dlungia. I privac fej sö le toch de scolina nü "tles tla man", porchël i á le Comun dé jö sües cuotes tl frabicat dla nodadoia y dé pormez ince na cubatöra implü destinada al residence. Intant án trat jö n toch de nodadoia por i fá lerch ala scolina nöia. I laurs da fá sö ess messü mëte man ai 16 de merz, mo le virus á tigní sö ince i cantiers. Impormó dan püc dis án indó podü mëte man da lauré. Denanche jí inant cun le proiet dl residence (che ó dí impröma trá jö döt le rest dla nodadoia), messarán rové la scolina.  (pablo)