La Usc di Ladins

La parora „traduziun“ vëgn dal latin „traductio“ y ó di trasporté, trasferí. Tres la traduziun vëgn na parora, n'opera o na poesia trasportades da n lingaz a n ater. Al é n pü' sciöche n iade te na realté desfarënta, te n contest nü y atramënter. Y tres chësc iade él dagnora valch che se müda, valch che vá a perde o che vëgn lapró. Na traduziun n'é nia plü l'opera originala; al é n'opera nöia, che perd forsc valch che l'autur á orü dí, mo che vëgn arichida dal tradutur y da so monn. Tröpes é les traduziuns dles operes dla poetëssa de Badia Roberta Dapunt y sëgn ala fin d'otober á l'editur Folio dé fora „die krankheit wunder le beatitudini della malattia“, racoiüda de poesies che trata le tema dla maratia, dla demënza y dl Alzheimer. Deplü sön chësta opera y sön le film „Scrivo ad alta voce“, de chël che Roberta Dapunt é protagonista, podëise lí tl'ediziun di 6 de novëmber.  (kp)