La Usc di Ladins

I Aiüc Covid paiá fora tres le Raiun Sozial é sostëgns d’öga y röia ince a destinaziun. Chësc vëigon bele dales zifres: 629 domandes menades ite, feter 1,7 miliuns de euro paiá fora da dezëmber incá: cin’ iadi tan co la soma che an paia fora normalmënter te n ann. Ala responsabla dl Raiun Sozial Val Badia Siglinde Erlacher ti unse damané deplü.

Siglinde Erlacher, la pandemia á lascé jënt mëisc alalungia zënza laur, y á porté families te strëntes finanziares... Ci situaziun ëise pa viü te chësc tëmp?
Metü man ára bele l’ann passé da d’aisciöda, che jënt ne podô tratan le lockdown nia lauré. Iló êl gnü deliberé la pröma prestaziun Covid, olache al ê ciamó gnü ite dorata püces domandes. Da dezëmber inant é la situaziun gnüda cotan plü zitia. Tla Val Badia unse tröc colaboradus tl setur dl turism che n’á nia podü lauré y chël á dé na gran scassada. I aiüc nüs é piá ia ai 10 de dezëmber; bele te chël mëis él gnü ite tröpes domandes y ciamó dan Nadé unse podü paié fora les prömes prestaziuns. Dër tröpes domandes él gnü ite de jená y spo tresfora cina sëgn.

 (Intervista: Pablo Palfrader)