Iolan por 135 agn de sorvisc
Ai pröms d’aurí él gnü tigní la cëna dla Crusc Blancia Mareo. La dërta ocajiun por onoré i volontars cun tröc agn de sorvisc
La Crusc Blancia Mareo á albü da recuperé la "cëna da Nadé", che n’â nia podü gní tignida por via dla situaziun ciamó zitia cun le coronavirus. La serada de compagnia y buna löna tla ostaria Pederü é garatada ai pröms d’aurí y é ince stada la dërta ocajiun por onoré chës volontares y chi volontars che é bele da tröc agn lapró. En chësc iade n’él sté sis che á podü pié do le diplom: Heinrich Pallestrong é gnü onoré por 30 agn de sorvisc, Katia Sorbatelli por 25 agn; Harald Frenner á ciafé le diplom por 20 agn de sorvisc volontar, Manuel Kehrer y Andrea Ploner intrami por 15 agn y Lisa Complojer por 10 agn. Le diretif dla Crusc Blancia á orü rengrazié i onorá por i tröc agn de contribut prezius, mo ince i dí n giulan a düc i atri volontars por ci che ai á fat y fej dötaurela por le bëgn dla uniun y sambëgn dla jënt.
Galaria retrac
View the embedded image gallery online at:
https://www.lausc.it/valedes-ladines/val-badia/19385-iolan-por-135-agn-de-sorvisc#sigProIda69afb1975
https://www.lausc.it/valedes-ladines/val-badia/19385-iolan-por-135-agn-de-sorvisc#sigProIda69afb1975